धनुषा घटनाको विरोधमा रौतहटमा टायर बालेर प्रदर्शन: साम्प्रदायिक सद्भाव कायम राख्न माग

रौतहट, २० पुस । ​मधेस प्रदेशको धनुषा जिल्लामा गत शुक्रबार मस्जिदमाथि भएको आक्रमण र ढुङ्गामुढा प्रहारको विरोधमा रौतहटमा आइतबार साँझ टायर बालेर प्रदर्शन गरिएको छ।

जिल्लाको यमुनामाई गाउँपालिका वडा नं. ५ स्थित बमनहरमा पर्ने गौर-चपुर सडक खण्डमा स्थानीय मुस्लिम समुदायले विरोध प्रदर्शन गरेका हुन् ।

​नेपाल मुस्लिम शान्ति समाज सङ्घ रौतहटका जिल्ला अध्यक्ष समी हकतर जामी र अनवर हासमीको नेतृत्वमा उत्रिएका प्रदर्शनकारीहरूले सडकमा टायर बालेर केही समय आवागमन अवरुद्ध पारेका थिए। धनुषामा धार्मिक स्थलमाथि भएको भौतिक आक्रमणले मुस्लिम समुदायको धार्मिक भावनामा चोट पुर्‍याएको भन्दै उनीहरूले आक्रोश व्यक्त गरे।

​प्रदर्शनका मुख्य माग र नाराहरू

​बिरोध प्रदर्शनमा सहभागीहरूले विभिन्न नाराहरू लगाउँदै दोषीमाथि कडा कारबाहीको माग गरेका छन्। प्रदर्शनका क्रममा लगाइएका केही प्रमुख नाराहरू यस प्रकार थिए:

​"हामी सबै नेपाली एक हौं, साम्प्रदायिक सद्भाव कायम गर।"

​"मुस्लिम समुदायमाथिको आक्रमण निन्दनीय छ, यस्ता कार्य तत्काल बन्द गर।"

​"मस्जिद र कुरान जलाउने जस्तो जघन्य अपराध गर्नेलाई कानुनी कठघरामा उभ्याऊ।"

​"समाजमा भड्काउ भाषण दिने र सद्भाव बिगार्ने नेताहरूलाई अविलम्ब कारबाही गर।"

​"हिन्दु सम्राट सेनाको नाममा गरिने रंगदारी र अराजकता स्वीकार्य छैन।"

​​विरोध सभालाई सम्बोधन गर्दै नेपाल मुस्लिम शान्ति समाज संघका जिल्ला अध्यक्ष समी हकतर जामीले नेपाल बहुभाषिक र बहुधार्मिक देश भएकोले यहाँ सबै धर्मको सम्मान हुनुपर्ने बताए। उनले भने, "धनुषामा मस्जिदमाथि जुन प्रकारको प्रहार भयो, त्यसले शान्तिपूर्ण सह-अस्तित्वमा खलल पुर्‍याएको छ। सरकारले दोषीलाई तत्काल पक्राउ गरी कारबाही नगरेसम्म हाम्रो आन्दोलन रोकिने छैन।"

​अर्का अगुवा अनवर हासमीले सामाजिक सञ्जाल र सार्वजनिक मञ्चहरूबाट घृणा फैलाउने अभिव्यक्ति दिनेहरूका कारण यस्ता घटना बढिरहेको भन्दै सुरक्षा निकायको ध्यानाकर्षण गराए।

​प्रदर्शनका कारण केही समय गौर-चपुर सडक खण्डमा सवारी साधनहरू रोकिएका थिए। पछि स्थानीय प्रशासन र सुरक्षाकर्मीको सक्रियतामा स्थिति नियन्त्रणमा लिई सडक सुचारु गरिएको थियो। हाल उक्त क्षेत्रमा सुरक्षा सतर्कता बढाइएको हो ।