बमनहर चौकमा सुहानी मिठाई पसलमा भीषण आगलागी, लाखौंको क्षति
रौतहट, १७ कात्तिक । जिल्लाको बमनहर चौकमा अवस्थित सुहानी मिठाई पसलमा गत राति आइतबार आगलागी भएको छ। विजय साहले सञ्चालन गरेको उक्त पसलमा भएको आगलागीबाट पसलभित्र रहेका सामान, नगद र गरगहना गरी करिब ३ लाख रुपैयाँ बराबरको क्षति भएको प्रारम्भिक अनुमान गरिएको छ।स्थानीय प्रत्यक्षदर्शीका अनुसार आइतबार राति करिब ९:३० बजेको समयमा पसल बन्द रहेको अवस्थामा एक्कासी धुवाँको मुस्लो निस्केको थियो। स्थानीयबासीले धुवाँ देखेपछि तत्काल आगो नियन्त्रणको प्रयासमा जुटेका थिए।
घटनालाई लिएर स्थानीयबासीमा गम्भीर शङ्का उत्पन्न भएको हो । उनीहरूका अनुसार अज्ञात व्यक्तिहरूले पेट्रोल छर्केर जानाजानी आगो लगाएको हुन सक्ने आशंका गरिएको हो। पसल पूर्ण रूपमा बन्द रहेको अवस्थामा यसरी भीषण आगलागी हुनुले शङ्कालाई बल पुर्याएको स्थानीयहरू बताउँछन्।
पसलका सञ्चालक विजय साहका अनुसार आगलागीबाट पसलमा रहेका मिठाई, तयारी खाद्य सामग्री लगायतका सामानहरू पूर्ण रूपमा जलेर नष्ट भएका छन्। सबैभन्दा ठूलो क्षति भने पसलको नगद र गरगहनामा भएको हो ।
"पसलमा बिक्रीबाट जम्मा गरिएको नगद पैसा र केही स-साना गरगहना समेत आगोमा परेर खरानी भएका छन्," साहले भावुक हुँदै बताए। उनको भनाइ अनुसार आगलागीले गर्दा उनलाई करिब ३ लाख रुपैयाँ बराबरको नोक्सानी भएको हो ।
आगलागीको जानकारी पाउने बित्तिकै स्थानीयबासीहरू ठूलो संख्यामा भेला भएर आगो नियन्त्रणको प्रयासमा लागेका थिए। उनीहरूको प्रयासबाट आगो थप फैलिनबाट जोगिए पनि पसलभित्रको क्षति भने रोक्न सकिएन।
घटनास्थलमा इलाका प्रहरी कार्यालय राजपुर तथा बमनहर प्रहरी टोली पनि तत्काल पुगेका थिए। प्रहरी र स्थानीयको संयुक्त प्रयासबाट ढिलो गरी आगो नियन्त्रणमा आएको थियो।
अस्थायी प्रहरी पोष्ट बमनहरका प्रहरी अधिकारीहरूले घटनाको प्रारम्भिक अनुसन्धान भइरहेको जानकारी दिएका छन्। आगलागीको कारण पत्ता लगाउन प्रहरीले विभिन्न कोणबाट छानबिन गरिरहेको बताए।
