राजपुर-१ का बाढी प्रभावित टोलहरूमा वडाध्यक्ष शेखद्वारा स्थलगत निरीक्षण
रौतहट, २१ असोज । जिल्लाको राजपुर नगरपालिका वडा नम्बर १ का विभिन्न टोलहरूमा अविरल वर्षा र बाढीले पुर्याएको क्षतिको वडाध्यक्ष शेख अमरुल्लाहले स्थलगत निरीक्षण गरेका छन् । वडा कार्यालयले बाढीबाट प्रभावित भएकाहरूलाई भेटेर तत्काल राहत उपलब्ध गराउने तयारी गरेको छ।
अध्यक्ष शेखले वडाका पिपरा, भगवानपुर र बहुअर्वा लगायतका टोलहरूमा बाढीपीडित नागरिकहरूसँग भेटघाट गरी उनीहरूको अवस्थाबारे जानकारी लिएका हुन् । बाढीको पानी घरभित्र पसेर ठूलो क्षति पुगेको र दैनिक जीवनयापनमा समस्या आएको भन्दै पीडितहरूले वडाध्यक्ष समक्ष गुनासो राखेका छन्।
वडाध्यक्षको जानकारी:
स्थलगत निरीक्षणपछि सञ्चारकर्मी सत्येन्द्र प्रताप सिंहलाई जानकारी दिँदै वडाध्यक्ष शेख अमरुल्लाहले वडा नम्बर १ मा करिब ३ सय घरधुरी प्रत्यक्ष रूपमा बाढीबाट प्रभावित भएको बताए। उनका अनुसार धेरैजसो घरहरू जलमग्न भएका छन् भने खाद्यान्न, लत्ताकपडा र अन्य आवश्यक सामग्रीहरू नष्ट भएका छन्।
"बाढीले हाम्रो वडाका नागरिकलाई ठूलो समस्यामा पारेको छ। हामीले प्रभावित टोलहरूमा पुगेर नागरिकको पीडा सुनेका छौं," वडाध्यक्ष शेखले भन्ने, " तत्कालका लागि खाद्यान्न, त्रिपाल र प्राथमिक स्वास्थ्य सामग्रीसहितको राहत प्याकेज उपलब्ध गराउन नगरपालिका र सम्बन्धित निकायसँग समन्वय गरिरहेका छौं।"
बाढीपीडितको अपेक्षा र स्थानीय सरकारको भूमिका
बाढीले घर डुबानमा परेपछि धेरै परिवारहरू अहिले खुला आकाशमुनि वा सुरक्षित स्थानमा आश्रय लिएर बसिरहेका छन्। उनीहरूले तत्काल खानेपानी, सुक्खा खाना र ओतका लागि सहयोगको अपेक्षा राखेका छन्।
वडाध्यक्ष शेख अमरुल्लाहले बाढीपीडितहरूको उद्धार तथा राहत वितरण कार्यमा वडा कार्यालय पूर्ण रूपमा सक्रिय रहेको बताउँदै विपद्को यस घडीमा धैर्य गर्न र सुरक्षित रहन नागरिकहरूलाई आग्रह गर्नुभएको छ। वडा कार्यालयले क्षतिको पूर्ण विवरण संकलन गरी दीर्घकालीन पुनर्स्थापनाका लागि पनि योजना बनाउने बताए।
स्थानीय सरकारको प्रतिनिधि स्वयं फिल्डमा उत्रिएर निरीक्षण गर्नु र तत्काल राहतको आश्वासन दिनुले बाढीपीडित नागरिकहरूमा केही हदसम्म आशा पलाएको छ। यद्यपि, पीडितहरूले भने तत्काल र पर्याप्त राहत सामग्री समयमै उपलब्ध गराउनुपर्ने माग गरेका छन्।
