राससको ‘तस्बिर प्रदर्शनी’ युवापुस्ताका निम्ति देशबारे जान्ने अवसर : सांसद थापा
काठमाडौँ, २८ जेठ । नेपाल कम्युनिष्ट पार्टी (एमाले) का युवा नेता तथा प्रतिनिधिसभा सदस्य सूर्य थापाले राससले आयोजना गरेको ‘तस्बिर प्रदर्शनी’ युवापुस्ताको निम्ति देशबारे जान्ने अवसर हुने बताउनुभएको छ ।
गणतन्त्र दिवस–२०८२ का अवसरमा राससले गत जेठ ११ गतेदेखि आयोजना गरेको तस्बिर प्रदर्शनीको आज अवलोकन गर्दै उहाँले भन्नुभयो, “युवा आफैँले जान्दैनन्, हामीले नयाँ पिँढीलाई गौरवगाथाहरु हिमाल, पहाड तराईका संस्कार, संस्कृति, पुर्खाका गौरवगाथालाई बुझाउँदै जानुपर्छ, जानेनन् भनेर गुनासो गर्नेभन्दा पनि उनीहरुलाई सिकाउनुपर्छ ।”
भद्रकाली प्लाजास्थित रासस केन्द्रीय कार्यालयमा ‘पर्वतीय पर्यटन: हाम्रो शान हाम्रो पहिचान’ आयोजित प्रदर्शनीमा हिन्दूकुश हिमशृङ्खलाका हिमाल, हिमाली र पहाडी जनजीवन तथा देशका प्रमुख पर्यटकीयस्थलका ९६ तस्बिर समेटिएका छन् । पछिल्लो समयमा आफ्नो देशको सौन्दर्य हेर्ने र त्यसमा गौरव गर्नेभन्दा पनि नकारात्मक देख्ने प्रवृत्ति बढ्दै गएको सन्दर्भमा रासस ‘तस्बिर प्रदर्शनी’ आयोजना गर्नु समय सान्दर्भिक भएको सांसद थापाको भनाइ छ ।
प्रदर्शनीमा जलवायु परिवर्तनका कारण नेपालजस्ता पर्वतीय मुलुकले व्यहोर्नुपरेका समस्याप्रति अन्तर्राष्ट्रिय समुदायको ध्यानाकर्षण गराउने उद्देश्यले नेपाल सरकारद्वारा हालै सम्पन्न ‘सगरमाथा संवाद’ कार्यक्रमलाई जोडेर रासस समाचारदाता र फोटो पत्रकारले विभिन्न कालखण्डमा खिचेका हिमाल, पर्वत तथा पर्यटकीयस्थलसम्बन्धी तस्बिर समावेश गरिएका छन् ।
नेपालको हिमाल नेपालको मात्रै नभएर संसारकै महत्त्वपूर्ण सम्पत्ति भएको उल्लेख गर्दै नेता थापाले भन्नुभयो, “प्रदर्शनीमा पर्यटकीय प्रवर्द्धन र भौतिक विकाससँग जोडिएका तस्बिर पनि राखिएका रहेछन्, अन्य विभिन्न क्षेत्रका महत्त्वपूर्ण तस्बिर राखिएका रहेछन्, यो आफैँमा उत्कृष्ट काम हो,” उहाँले भन्नुभयो ।
ग्राहकको मागलाई दृष्टिगत गरी राससले आफ्ना उत्पादनमा विविधता थपिरहेको सन्दर्भमा प्रदर्शनीले राससका समाचार र तस्बिरलाई अझ समृद्ध बनाउन सहयोग पुग्ने विश्वास गरिएको छ । राससले गत वर्ष भौतिक पूर्वाधार निर्माण र त्यसअघि मुलुकको सांस्कृतिक विविधतासम्बन्धी तस्बिर प्रदर्शनी गरेको थियो ।
जलवायु परिवर्तनबाट मानव सभ्यतामा आएको चुनौती, हिमाल र हिमाली जनजीवनमा परेको प्रभावबारे अन्तर्राष्ट्रिय सञ्चारमाध्यमले प्राथमिकताका साथ आवाज उठाइरहेका अवस्थामा हिमालको संरक्षणका लागि बहस र पैरवी गर्न तस्बिर प्रदर्शनीबाट योगदान पुग्ने विश्वास गरिएको छ ।
