ओमानका सुल्तानले पुटिनसँग मस्कोमा भेट गर्ने
मस्को, ६ वैशाख । ओमानका सुल्तानले रुसी राष्ट्रपति भ्लादिमिर पुटिनसँग वार्ता गर्न मङ्गलबार मस्कोको भ्रमण गर्नुहुने क्रेमलिन र मस्कटले शनिबार बताएका छन् । खाडी राष्ट्र ओमानले इरानको आणविक कार्यक्रममा उच्चस्तरीय वार्ताको मध्यस्थता गरिरहेको छ ।
क्रेमलिनले ओमानका सुल्तान हैथम बिन तारिकसँगको वार्ताले ‘अन्तर्राष्ट्रिय र क्षेत्रीय एजेन्डाका वर्तमान प्रश्नहरू’ साथै ‘व्यापार र आर्थिक’ र ‘वित्त र लगानी’ क्षेत्रमा सहयोग विकास गर्ने कुरा समेट्ने बताएको छ ।
ओमानका सुल्तानको कार्यालयले एक विज्ञप्तिमा पुटिनले सोमबारदेखि सुरु हुने दुई दिने राजकीय भ्रमणका लागि राजालाई आमन्त्रित गर्नुभएको बताएको छ । “यो भ्रमण ओमानको सल्तनत र रूसी सङ्घबीचको सम्बन्धलाई दुई देशको आकांक्षा पूरा गर्ने गरी प्रवर्द्धन गर्ने सन्दर्भमा आएको हो”, राजदरबारले भनेको छ । नेताहरूले ‘विभिन्न क्षेत्रमा दुई देशबीचको सहकार्यका क्षेत्रहरू र साझा हितलाई सेवा गर्न तिनीहरूलाई बढावा दिने उपायहरू’ बारे छलफल गर्ने बताइएको छ ।
प्रारम्भिक चरणको छलफलको एक हप्तापछि संयुक्त राज्य अमेरिका र इरानले शनिबार रोममा ओमानद्वारा मध्यस्थता गरिएको तेहरानको आणविक कार्यक्रममा वार्ता गरेका छन् । प्रारम्भिक चरणको छलफललाई दुवै पक्षले ‘रचनात्मक’ भनेर वर्णन गरेका थिए ।
