मंगलबार १५ जेठ, २०८१

नेपाली समय

वेदान्तका प्रखरवक्ता रिसाललाई पाणिनी पुरस्कार

वेदान्तका प्रखरवक्ता रिसाललाई पाणिनी पुरस्कार

काठमाडौँ, ५ वैशाख । विश्व हिन्दु महासङ्घले वेदान्तका प्रखरवक्ता एवं प्राध्यापक शिवगोपाल रिसाललाई विस २०८० को पाणिनी पुरस्कार प्रदान गरेको छ । महासङ्घको ४४औँ स्थापना दिवसका अवसरमा आज यहाँ आयोजित कार्यक्रममा राष्ट्रिय प्रजातन्त्र पार्टीका पूर्वअध्यक्ष तथा सांसद पशुपति शम्शेर जबराले रिसाललाई रु २५ हजार राशीको पुरस्कार र सम्मान पत्र प्रदान गर्नुभयो ।

त्यसअवसरमा रु ५० हजार राशीको ‘भरतकेशर सिंह विश्व हिन्दु अन्तर्राष्ट्रिय’ पुरस्कार महन्थ सुरेन्द्रनाथ अवधूतलाई प्रदान गरियो । कार्यक्रममा नीना भेटुवाल, सोभित उप्रेती र  लक्ष्मण सापकोटालाई ‘विश्व हिन्दु सेवा रत्न’ सम्मान प्रदान गरियो ।

मुलुकको कला, धर्म, संस्कृति, भाषा, संस्कार, वेशभूषा तथा सनातन वैदिक उन्नयनमा विशिष्ट योगदान पु¥याउने प्राडा माधवप्रसाद भट्टराई, वरिष्ठ अधिवक्ता शेरबहादुर केसीलगायत ११ जनालाई पनि समारोहमा सम्मान गरियो ।

रामनवमीका अवसरमा आयोजित उक्त कार्यक्रममा जैन, शिख, बौद्ध धर्म गुरुले स्वस्ति वाचन गर्नुका साथै  मर्यादा पुरुषोत्तम भगवान रामचन्द्रको तस्वीरमा माल्र्यापण गर्नुभयो । विस २०३० मा स्थापित महासङ्घले विश्वभर रहेका वैदिक सनातन  धर्मालम्बीलाई एकाकार गरी विश्वशान्ति र सहअस्थित्व कायम गर्ने साझा संस्थाका रुपमा काम गर्दै आएको कार्यवाहक अध्यक्ष अस्मिता भण्डारीले जानकारी दिनुभयो ।

त्यसअवसरमा महासङ्घद्वारा प्रकाशित ‘धम’ नामक स्मारिकको विमोचन समेत गरियो ।